Helse- og oppvekstfag er ei yrkesfagleg utdanning og er for deg som er omsorgsfull og liker å samhandle med andre. Etter 2 år på skule kan du gå ut i lære. Du kan også ta påbygg til generell studiekompetanse før eller etter læretida.
Kvifor velje helse- og oppvekstfag?
Ønskjer du å arbeide med menneske i ulike aldersgrupper og i ulike livssituasjonar? Då kan utdanningsprogrammet helse- og oppvekstfag vere noko for deg. Du må bry deg om og kunne ta omsyn til andre menneske. Du bør ha gode kommunikative evner og evne til samhandling.
Ei utdanning innan helse- og oppvekstfag gir deg moglegheit til å arbeide som mellom anna helsefagarbeidar, ambulansearbeidar eller portør. Du kan også velje å arbeide med barn i barnehage og skule/SFO, som barne- og ungdomsarbeidar, helsesekretær, apotekteknikar, hudpleiar med meir.
Vi tilbyr:
Innan helse- og oppvekstfag tilbyr vi følgjande utdanningsprogram:
- vg1 helse- og oppvekstfag
- vg2 helsearbeidarfaget
Yrkesfagleg opplæring fører fram til eit yrke og gjev yrkeskompetanse med eller utan fag- eller sveinebrev. Du kan gå ut i yrkeslivet etter 3-5 år, eller du kan ta vidare utdanning, t.d. ved fagskule eller høgskule. Du kan også ta påbygging til generell studiekompetanse før eller etter fagbrevet, om du vil studere vidare ved høgskule eller universitet.
Stryn vidaregåande skule er ein moderne og framtidsretta skule som ligg sentralt i Stryn sentrum. Skulen har lange tradisjonar knytt til samarbeid med lokalt arbeids- og næringsliv. Det er derfor svært naturleg å nytte ulike arenaer i opplæringa til elevane for å knytte saman teori og praksis.
Vg1
I løpet av skuleåret får du prøve ut eit eller fleire lærefag gjennom arbeidspraksis i bedrift, slik at du vert sikrare på at du vel rett utdanningsveg. På vg1 vert 10 veker i løpet av skuleåret nytta til prosjekt i samarbeid med lokale bedrifter, fordjupingsoppgåver og arbeidspraksis for elevane. Elevane har ikkje fellesfag desse 10 vekene.
Opplæringa er delt inn i:
- 17 timar programfag per veke
- 12 timar fellesfag per veke
- 6 timar per veke med yrkesfagleg fordjupning
Vg2
I løpet av dette skuleåret får du moglegheit til å fordjupe deg innan valt yrkesområde. Som på vg1 har du 10 veker i løpet av skuleåret som vert nytta til arbeidspraksis, fordjupingsoppgåver og prosjekt i samarbeid med kundar eller lokale bedrifter. På vg2 kan elevar som ønskjer det, få vere i praksis i større grad. Skulen har også erfaring med internasjonale prosjekt som elevane har delteke i.
Opplæringa delt inn i:
- 17 t programfag per veke
- 9 timar fellesfag pr veke
- 9 timar per veke med yrkesfagleg fordjupning
